Taibesi Hamrok ba Bee Mos

Komonidade sira iha Aldeia Depozitu Penál, Taibesi, Suku Lahane Orientál nian, Postu Administrativu Nain Feto, Municipiu Dili preokupa makas tanba durante tinan rua ona sira la asesu ba Bee mos.

Deputadu Bankada FRETILIN Florentina Smith foti kestaun ne’e iha plenaria Parlamentu Nasional (17/10/2016) bainhira halo kontaktu eleitorál ho komonidade sira iha area ne’eba.

  “Kauze tinan rua ona, komonidade sira iha ne’eba la asesu Bee mos,” dehan Florentina.

Florentina dehan, komonidade sira iha Aldeia Depozitu Penál lamenta tanba sira hela iha kapitál Dili laran deit maibé la asesu ba Bee mos.

“Iha kapital Dili, liliu sira iha area Taibesi ne’e, agora Bee laiha komonidade hirus,” dehan Florentina.

Fo hanoin ba governu, atu rejolve problema Bee mos ba komondiade sira iha area Taibesi, liliu komonidade sira iha Aldeia Depozitu Penal.

“Ita sente moe wainhira ita tun ba baze ita nia komonidade koalia buat oioin,” dehan Florentina.

Nutisia Lalos Kuandu Dehan Tribunal Notifika Deputadu FRETILIN Nain 10

Prezidenti Bankada FRETILIN Kamarada Deputadu Aniceto Guterres hatete, nutisia ne’ebé fo sai iha publiku katak, Tribunal notifika deputadu FRETILIN nain 10 ne’e lalos no sala.

Kamarada Deputadu   Aniceto Guterres lamenta tanba nutisia ne’e laos halo públiku preokupa maibé halo ema FRETILIN rasik preokupa tanba samak deputadu FRETILIN nain 10 atu ba hatan iha Tribunal ne’e problema saida?

Kamarada Aniceto dehan, karta ida mai husi Polisia Cientifika  de investigasaun Criminal (PCIC), karta ne’e laos mai husi  Ministeriu Publiku laos husi Tribunal.

“Atu husu levantamentu imunidade, ne’e deit mos sala tiha ona, dehan atu hatan ba Tribunal mais husi Tribunal ne’emos sala tiha ona,” dehan Kamarada Aniceto.

Karta  ne’ebé PCIC direize , Aniceto dehan, tanba iha loron 16 Maio 2016, Deputadu FRETILIN  nain 10 hatama surat keixa ida ba Ministeriu Publiku.

“Keixa konaba partidu politiku balun, hau dehan iha ne’e partidu KHUNTO  iha sira nia (pagina) facebook hakerek hanesan ne’e. KORKA anti Buibere Maubere, Gerasaun KORKA sei tesi Maubere Buibere sira nia kakorok, liafuan sira ne’e (iha pagina) facebook partidu KHUNTO ninian, ami hetan. Tanba liafuan sira ne’e, liafuan ameasa, agora iha momentu ida  kazu akontesementu terorismu barbarak, bele akontese iha ne’e (TL) , ameasa sira hanesan ne’e krimi,” dehan Kamarada Aniceto.

Iha rai ida estadu de direitu demokratiku hanesan TL, Kamarada Aniceto dehan,  kazu sira hanesan ne’e krimi tanba labele iha partidu politiku ida moris so atu kontra partidu politiku sira seluk.

“Ne’e ameasa real, ita akompaña foin dadauk partidu KHUNTO nia kabesadu (lider) ida hetan ona termu de identidade rezidensia, tanba komete krimi sira hanesan ne’e iha hela prosesu investigasaun,” dehan Kamarada Aniceto.

Tanba ne’emak, Kamarada Aniceto dehan, informasaun ne’ebé sai iha publiku ne’e lalos no sala, PCIC haruka karta ba PN tanba keixa ne’ebé mak Deputadu FRETILIN hato’o ba Ministeriu Publiku.

“Polisia Cientifika atu hahu investigasaun ba keixa ne’ebé ami halo ne’e, entaun Polisia Cientifika haruka karta ne’e mai. Mai iha PN husu depoimentu deputadu sira ne’ebé asina karta ne’e. Ne’ebé polisia Cientifika marka kedas loron, hau mak primeiru subkritor ba karta ne’e, iha ba 26 sentenbru, deputadu Joaquim ba 26 Setenbru mos, Deputadu Fransisco Miranda 27, Deputadu Josefa 27 Setenbru , Deputadu David Dias Mandati 28 Setenbru. Polisia Cientifika tau hotu kalendariu ne’e para ami ba halo depoimentu atu reforsa ami keixa ne’ebé ami halo tiha ona, laos inkeretu laos investigasaun so para atu fó depoimentu,” dehan Kamarada Aniceto.

Nutisia ne’ebé vice prezidenti Komisaun C koalia ne’e lalos hodi hamosu interpretasaun oioin iha publiku.

“Hau hein katak komisaun G, liu husi prezidenti ka vice prezidenti halo los fila fali nutisia ne’e. 

Tanba to’o agora ami esklarese tiha ona mais situasaun iha facebook ne’e kontinua hanesan ne’e, prezudika FRETILIN,” dehan Aniceto.

Iha fatin hanesan Kamarada Deputadu Antoninho Bianco ejizé prezidenti ho vice komisaun G tenki ralat ninia lia fuan tanba hatete fali buat ne’ebé los.

“Buat ne’ebé seidauk los ne’e lalika naran koalia arbiru deit, tanba ita prezidenti ho vice tenki hatete buat ne’ebé los, purque ami sira iha ne’e, buat ne’ebé lalos ami la naran koalia,” dehan Bianco.

Entertantu Kamarada Deputada Ilda Maria da Conceição hatete bainhira deputadu ida hakarak fo informasaun ba publiku tenki inteira didiak ho asuntu nune’e labele prejudika ema seluk nia naran diak.

“Ami sente ami la halo sala buat ruma nusa mak bele hasai ami nia umunidade ba hatan iha Tribunal, ida ne’e tenki klaru, favor ida, ita kuandu hasai informasoens ba liur liliu ba media ita tenki hatene atu koalia saida? Ita hotu atu koalia intera ba asuntu ita atu koalia, labele halo foer ema nia naran kuandu ema nain rasik la hatene,” lamenta Kamarada Ilda.

Prezidenti Komisaun G, Parlamentu Nasional ne’ebé  trata asuntu etika Deputadu Agostino Lay hatete, nutisia ne’ebé sai iha publiku katak, Tribunal notifika deputadu FRETILIN nain 10 ne’e lalos no sala.

Agostino Lay dehan, Prezidenti PN baixa ba Komisaun G karta ida mai husi Polisia Cientifika Investigasaun Criminal (PCIC) ne’ebé husu autorizasaun Deputadu FRETILIN nain 10 atu presta depoimentu iha PCIC.

“Karta ne’e mai husu autoriza membru deputadu nain 10 ne’ebé PCIC hakerek sira nia naran mai atu ba presta sira nia deklarasaun hanesan testamuña, karta ne’e laos mai husi Ministeriu Publika , laos mai husi Tribunal,” dehan Agostino Lay.

Agostino realsa, karta ne’e rasik mos expire tiha ona tanba bainhira karta ne’e direze ba Komisaun G, iha tenpu hanesan komisaun G halo hela servisu iha rai liur.

“PCIC haruka karta ida mai Prezidenti PN baixa mai Komisaun G iha fulan Sentenbru mais antes dia 20 ita halo sesaun solene iha tenpu ne’eba komisaun halo hela trabalhu iha liur, ami fila fali mai ami konvoka reuniaun iha 28 Setenbru,” dehan Agostino.

Agostino dehan, karta ne’e expire tanba iha karta ne’e marka kedas loron atu deputadu sira bele fo depoimentu iha PCIC iha loron 26, 27 no 28 Setenbru 2016.

“Ami halo inkontru iha 28 (setenbru) tanba ne’e hau halo fali karta ida Prezidenti Parlamentu atu husu ba PCIC para atu halo fali karta foun mai tanba karta ida uluk ne’e la vale tiha ona,” dehan Agostino Lay.

Tanba ne’emak Agostino dehan, karta Komisaun G husu ba prezidenti PN atu bele husu ba PCIC atu halo karta foun laos husu ba Prezidenti  Parlamentu Nasional atu autoriza.

Entertantu Vice prezidenti Komisaun G Deputada Maria Belo hatete, jornalista intervista duni nia hodi husu konaba kontuidu karta ne’e maibe nia la hatetete dehan karta ne;e mai husi Tribunal.

“ Sira (jornalista) husu duni (karta) ne’e konaba saida? Ne’emak hau ladun esklaresidu parese problema nene konaba partidu. Hau temi duni prezidenti bankada nia naran ho membru nain rua nia naran, mais laos hatete dehan ba iha Tribunal,” dehan Maria Belo.

Merenda Eskolar iha Eskola Privadu Paradu

Programa merenda eskolar iha eskola privadu paradu halo labarik sira ne’ebé mak eskola iha eskola la goza sira nia direitu ba merenda eskolar maske Parlamentu Nasional kada tinan aprova osan ba programa ne’e.

Deputada Bankada FRETILIN Kamarada Josefa Pereira foti kestaun ne’e iha plenaria loron 10/10/2016 husu atu investiga hodi hetan problema nia fukun nune’e bele rejolve problema.

“Ita kontinua observa implementasaun merendar eskolar iha eskola privadu nafatin atraza halo konke labarik sira la goza sira nia direitu ne’ebé ita aprova iha Parlamentu Nasional,” dehan Josefa.

Kamarada Josefa duvida ho servisu KONETIL ne’ebé gere orsamentu no programa merenda eskolar ba eskola privadu sira.

“Saida mak akontese iha KONETIL ne’e? falta de verba ne’ebé tuir lolos governu aloka ba rekening KONETIL nian, se hanesan ne’e iha ne’ebé los?  ita tenki hare verba ne’ebé desagrega  iha Igreza o entaun iha asuntu seluk,” dehan Josefa.

Persiza investigasaun profundu ida atu bele hatene problema fukun ne’e iha ne’ebé  ka inkapasidade husi KONETIL nian.

“Hau labele interfere maibe iha asuntu ida ke importante ida ne’e ita koalia konaba direitu labarik ninian,” dehan Josefa.

Ezenplu , Josefa dehan, iha Sub-distritu Remexiu, Distritu Aileu, iha  eskola privada ho eskola do estadu hela distansia la dook malu,  enkuantu eskola privada hela asiste deit tanba merenda eskolar paradu, eskola publika goza sira nia direitu merendar eskolar.

“Tanbasa iha tratamentu dezigualidade entre eskola privadu no publiku, ida ne’e pergunta ida mai hau, tanba durante ne’e akontese iha fatin fatin, eskola privadu merenda eskolar sempre atrazu I dala barak too tiha tres ou sincu mezes,” dehan Josefa.

Ida ne’e, Josefa dehan,  labele akontese governu ho Igreza tenki iha kordenasaun atu rejolve problema ne’e.

“Tratamentu ida ne’e (merenda) eskolar ne’e tenki igual, hanesan ba larik sira iha pais Timor Leste maibe tanba saida mak husi parte Igreza nian sempre atraza,” dehan Josefa.

Korente Mota Kasa Ameasa Komonidade Nia Hela Fatin

Mota Kasa, iha Suku Kasa, Distritu Ainaro ameasa komonidade sira nia hela fatin tanba korente mota komesa sobu komonidade nia natar no hela fatin.

Deputadu Bankada FRETILIN Kamarada Antoninho Bianco foti kestaun ne’e iha plenaria Parlamentu Nasional (11/10/2016) husu governu urgente atu bele halo moru protesaun ba mota Kasa.

“Natar balun mohu tiha ona, sira (povu) preokupa tau moru para mota tun karik labele tama fali sira nia hela fatin,” dehan Kamarada Bianco.

Bainhira governu la fó atensaun lalais, Bianco dehan, kuandu mota tun bee bele sobu komonidade sira nia hela fatin.

“Ne’e tama ema nia bee matan mos ba hotu, dala ruma uma ba hotu,” dehan Bianco.

Iha ponte Kasa nia karaik, Bianco dehan, mota sobu tiha ona irigasaun ne’ebé fornese bee ba agrikultor sira nia natar.

“ Iha Ainaro, parte Kasa mak bele halo natar, tanba ne’e tenki hadia lalais para povu sira bele halao sira nia servisu,” dehan Bianco.

FRETILIN Kongratula Antonio Guterres Ne’ebé Eleitu ba Sekretariu Geral ONU

Kongresu nasional FRETILIN ba dala haat (4) iha ne’ebé halao durante loron tolu, hahu husi loron (7/10/2016) too (9/10/2016) aprova mos rezulusaun ida hodi  kongratula eis Primeiru Ministru Portugal Antonio Guterres ne’ebé eleitu ba Sekretariu Geral Nasoens Unidas (ONU) periodu mai.

Tuir rejolusaun ho numeru 10 sita katak, Ir. Antonio Guterres ne’ebé eleitu ba Sekretariu Geral Nasoens Unidas (ONU), FRETILIN konsidera hanesan Vitoria ba Comonidade Pais Lingua Portuguesa (CPLP).

Eis Primeiru Ministru Portugal Ir. Antonio Guterres rasik  nudar amigo diak povu Timor Leste nian no sempre firme  apoio TL nia luta libertasaun nasional.

Sekretariu Geral FRETILIN Mari Alkatiri hatete, Ir. Antonio Guterres eis Primeiru Ministru Portugal no Sekretariu Geral partidu  Sosialista Portugal bainhira sei asumi kargu nudar sekretariu relasoens externa Partidu Sosialista iha tinan 1980 sempre apoia luta Timor Leste nian ba ukun an.

“Ita kontenti bainhira nia eleitu ba sekretariu geral nasoens unidas, akordu 5 Maio hodi lori referendum mai Timor Leste iha tenpu governu Antonio Guterres nian,” dehan Dr. Mari Alkatiri.

Antonio Guterres nudar Sekretariu Geral ONU foun, Dr. Mari Alkatiri dehan, importante tebes  ba luta povu TL nian ba fronteira tasi ho Australia.

 “Importante tebes ba ita,  liliu agora ita tama hela iha faze foun negosiasaun mar de timor ,” dehan Dr. Mari.

Prezidenti Onorariu FRELIMO Simu Sertifikadu husi FRETILIN

Prezidenti Onorariu Frente Revolusionária Libertasaun Moçanbique (FRELIMO) Joaquim Cesano simu sertifikadu rekuñesementu no kartaun militantes husi Frente Revolusionária Timor Leste Independente (FRETILIN) ba kontribuisaun ne’ebé halo iha luta libertasaun nasional Timor Leste nian.

Sekretariu Gerál Partidu FRETILIN Dr. Mari Alkatiri hatete,  atual Prezidenti Moçanbique Joaquim Cesano fó nia kontribuisaun makas ba   luta libertasaun nasionál bainhira nia sei asumi kargu nudar Ministru Negosiu Estrangeiru iha primeiru governu Moçanbique nian.

Mari Alkatiri dehan, iha tinan barak nia laran iha luta deplomasia iha rai liur, Prezidenti Moçanbique  Jooquim Casano, bainhira sei asumi kargu nudar Ministru Negosiu Estrangeiru kontribuia makas ba luta lubertasaun nasional liu husi frente diplomasia.

Aktvidade luta diplomasia hotu ne'ebe timor oan halo iha rai liur, Dr. Mari Alkatiri dehan,  sempre hamutuk ho Joaquim Casano.

Entertantu Joaquim Casano sente kontente bainhira partisipa iha kongresu nasional FRETILIN nian.

Joaquim Casano dehan, FRETILIN mak sai vanguarda RDTL hodi garante paz no establidade no kontinua luta ba libertasaun do povu.

Dialogu importante tebes entre partidu iha Timor Leste, tanba partidu bele diferensia maibe luta ba objetivu ida deit mak libertasaun do povu.

Transparensia no Gestaun Diak Tenki Hahu husi Parlamentu

Xefe  Bankada FRETILIN Deputadu Aniceto Guterres hatete, transparensia no gestaun diak tenki hahu Parlamentu Nasional hodi nune’e  bele sai ezenplu ba orgaun estadu seluk.

Kamarada Aniceto Guterres dehan ida ne’e bainhira Parlamentu Nasional halo diskusaun ba orsamentu privativu PN ba tinan 2017 (04/10/2016).

Iha diskusaun ne’e, Kamarada Aniceto apoio makas relatoriu komisaun C, ne’ebé tranta asuntu finansas publiku husu atu halo auditoria ida ba PN.

“Hau husu eskreve rekomendasaun husi Komisaun C nian mai iha ne’e, konaba atu halao auditoria ba Parlamentu Nasional durante ida ne’e, tenki loke dalan ba Tribunal Rekrusu, Câmara de contas atu halo auditoria ida ne’e,” dehan Kamarada Aniceto.

Atu garante boa governasaun no transparensia ba osan estadu, Kamarada Aniceto dehan, PN mak tenki sai ezenplu.

“Auditoria ne’e laos deit iha Sekretariadu (Parlamentu Nasional)  deit mais ba to’o bankada Parlamentar, sunvensaun ne’ebé bankada parlamentar simu ne’e, auditoria iha ga lae, tenki halo , ita uza halo nusa, transparensia, boa gestaun ne’e ,komesa husi parlamentu ida ne’e, komesa husi deputadu idaidak,” dehan Kamarada Aniceto

FRETILIN Ejize Inkeretu Parlamentar ba Tusan Estadu

Bankada FRETILIN liu husi Deputadu iha Parlamentu Nasional ejizé atu hari komisaun inkeretu parlamentar ida hodi halo inkeretu ba tusan (divida) ne’ebe mak estadu iha.

Iha plenaria PN loron (3/10/2016) Deputadu Bankada FRETILIN husu inkeretu parlamentar tanba iha orsamentu retifikativu Parlamentu Nasional harii komisaun eventual  ida atu halo akompañiamentu ba liquidas divida estadu ne’ebe iha relasiona ho projetu emergensia iha 2013 tuir lista projetu ne’ebe mak governu liu husi Ministeriu Obras Publika Transporte Telekomonikasaun aprezenta.

Membru Komisaun Eventual, Kamarada Deputadu Manuel Castro dehan, iha posiblidade osan ne’ebe Parlamentu Nasional aprova iha Orsamentu Retifikativu  la too atu selu tusan tanba Komisaun Eventual deteta projetu foun barak no projetu barak mak naran la tama iha lista ne’ebe governu aprezenta maibe projetu ne’e ejiste.

“Tuir ami nia observasaun katak, ho orsamentu ne’ebe tau (Iha Orsamentu Retifikativu) ita seidauk bele atu halakon dividas estadu ninian, tanba lista ne’ebe (governu) fo mai ami, ami hare ami deteta, iha vikeke iha mos projetu foun lubuk ida, ne’ebe la sita iha relatoriu husi ministeriu nian mai (ministeriu obras publika),” dehan Castro iha Plenaria.

Komisaun Eventual ne’e, Castro dehan, detekta mos iha kompañia balun oras ne’e dadaun halo projetu estrada iha Municipiu Vikeke maibe Ministeriu Obras Publika ho ADN la hatene.

“Ami husu ba Sekretariu Estadu atu hatoo ba Konselhu Ministru liliu kompañia ida agora dadauk ho nia ekipamentus desloka ba mai iha Vikeke, bolu nia ho se deit mak iha kotuk atu mai esplika perante governu,perante Parlamentu Nasional tanba samak sira halo sasan (projetu) sira ne’e sei kuñesementu estadu depois obriga governu atu selu,” lamenta Castro.

A’at liutan, Castro dehan, divida estadu nian balun mai husi kutru governu konstitusional (AMP) nia tenpu, ezenplu estrada ida husi Uatulari tuan ba Kapuas halo iha governu AMP nia tenpu maibe seidauk selu too agora.

“Ami husu ba Obras Publika, Obras Publika dehan ne’e iha tenpu Sekretariadu Obras Publika AMP nia tenpu (Domingos Caeiro) mak fó, too agora mak foin ita atu selu,” dehan Castro

Castro duvida ho politika Governu nian dehan atu hamos tusan estadu nian iha 2016, maibe iha realidade osan ne’ebe mak aloka iha Orsamentu retifikativu la too atu selu tanba tusan barak tebtebtes.

Iha fatin hanesan, Prezidenti Komisaun Eventual Parlamentu Nasional  Kamarada Deputadu Ossorio Florindo sujere atu PN kria komisaun inkeretu Parlamentar ida atu halo inkeretu ba tusan sira ne’e tanba gasta osan barak.

“Hau sujere ba Parlamentu Nasional atu ita dignifika ita nia servisu , antes mandatu ne’e hotu se bele ita halo inkeretu ida lori bankada hothotu nia naran, ba asuntu dividas ne’e tanba ne’e osan barak mak gasta iha ne’e ita la hatene,” dehan Ossorio.

 Iha fatin hothotu, Ossorio dehan, Governu la haruka mos kompañia sira ba servisu, depois liña ministeriais la hatene ,servisu ema la akompaña, ema la supervisiona, laiha dezeñu, laiha BOQ, hotu mak ba verefika naran selu deit.

“Ita dehan ba sobu projetu ne’emos dehan kontra lei, nusa mak la sobu kedas bainhira projetu ne’e hahu, maibe hau dehan hahu atu sobu halo nusa, bainhira hahu deit ministeriu deit la hatene, hahu deit ADN la hatene halo nusa mak estadu bele kontrola projetu sira hanesan ne’e, laiha estudu, laiha levantamentu dadus ida,” dehan Kamarada Osorio.

Projetu barak vistu previa mos laiha servisu lao tiha ona, maibe governu nudar nain ba projetu la konsege detekta projetu hirak mak iha karaik ne’eba satan PN ne’ebe fiskaliza deit tuir orsamentu ne’ebe mak PN aprova.

“Tenki iha desizaun ida forte atu lori ema sira ne’e ba tribunal,liu husi ita nia inkeretu ruma mak ita sei kria,hau hanoin ita fo mos hanorin ida ba ita nia emprezariu sira atu kaer projetu ho kualidade,” dehan Ossorio.

Ejizensia Deputadu Bankada FRETILIN nian hetan sekunda husi Deputada Alvina husi Bankada CNRT no Virgilho Ornai husi Bankada PD husu  PN tenki deskute hodi hatene osan ne’e tau atu halo seda, Estrada karik osan hirak, kilometru hira?

Prezidenti Bankada FRETILIN Kamarada Aniceto Guterres husu Meja Parlamentu Nasional atu egenda diskusaun ketak ida hodi rona  Komisaun Eventual nia progres report ida hodi deskute asuntu ne’e.

Liña Kordenasaun Laiha, Projetu ‘Bonkar Pasang’

Deputadu Bankada FRETILIN Kamarada Osorio Florindo preokupa makas falta kordenasaun entre Ministerial ba implementasaun projetu Estadu nian, hodi rejulta projetu sira ne’e Ministeriu ida halo ida ba sobu (bonkar pasang).

Ezemplu konkreta, Kamarada Osorio dehan, bainhira  Ministeriu Obras Publika liu husi direisaun identifikasaun bandu fatin ruma labele halo halte (fatin ba pasaseirus hein kareta) maibe Ministeriu Interior obriga ba halo.

“Edentifikasaun ne’e ba verefika labele halo, ita tenki fiar malu labele halo, atu halo fali iha fatin ida ne’ebe sira (Obras Publika ho Ministeriu Interior) tenki tuur hamutuk  deside labele Polisia ba ameasa fali dehan nasaun ne’e ami mak manda, ministeriu ida mos labele mai hapara fali ami nia servisu,” lamenta Ossorio iha Plenaria foin lalais ne’e.

Hahalok sira ne’e, Kamarada Ossorio dehan, hatudu katak falta kordenasaun intermenisterial e situasaun hanesan ne’e labele ajiste iha TL.

“Ne’e situasaun ida, hau hanoin hanesan Governu hanesan Estadu ne’e labele ejiste!,” dehan Kamarada Osorio.

Realidade ne’e hatudu katak, kualidade  servisu laiha, ohin ida halo, aban ida mai sobu, aban ida halo bainrua ida mai sobu tinan bainloron nasaun lao hanesan ne’e hela deit.

Ezenplu barak  hatudu ona, balun ba kee baleta hadia tiha depois la kleur  balun ba sobu fali tau fali pipa, la kleur seluk ba sobu fali tau fali fiu  elitrisidade .

Tanba ne’e, se Ministeiru Obras Publika , diresaun identifikasaun deside dehan labele halo tanba sira iha razaun teknika dehan labele halo, labele uza fali dehan boot Polisia mak obriga deit atu halo nasaun ne’e atu funsiona halo nusa?

 “Ita hakarak halo dezenvolvimentu ohin halo aban sobu, bainrua halo baintolu ba sobu,nasaun ne’e labele ejiste hanesan ne’e,” dehan Kamarada Ossorio

Povu TL 41,8% Sei Moris Kiak

Povu Timor Leste porsentu 41,8 (%) sei moris iha liña kiak nia okos, tuir relatoriu peskiza ne’ebé mak Ministeriu Finanas  halo iha tinan 2014.

Kompara ho tinan 2007 numeru kiak purvolta 47,2 % iha tinan 2014 numeru kiak iha Timor Leste tun ba 41,8%.  Entertantu desigulidade (gap) entre ema kiak no riku iha Timor Leste 29%, rejultadu ida ne’e la inklui tinan 2015 no 2016 nian.

Metodu ne’ebé mak Ministeiru Finansas uza mak peskiza konaba gastu kada ema ida nian ba konsumu, inklui asset ne’ebé sira iha, uma no ect. Relatoriu ne’e fo sai iha (28/9/2016) iha Ótel Timor/Dili.

Tenpu ona FRETILIN atu fila ba ukun hodi hasai povu husi kiak no mukit tuir komprimisiu FRETILIN nian katak Liberta Patria no Liberta Povu.

Ohin loron Patria Liberta ona, FRETILIN  sei nafatin hamutuk ho povu Maubere tama iha  segunda fase luta libertasaun total hasai povu husi kiak no mukit ho programa no planu ida diak hodi halo dezenvolvimentu ida ho responsablidade no kualidade.

Ezenplu konkreta, FRETILIN mak kria lei fundu petrolifeiriu hodi nune’e ohin loron Governu uza halo dezenvolvimentu, selu pensaun ba veteranu luta Libertasaun no fo subsidiu ba ferik katuas, bolsa estudu ba Timor sira, barak mak hasai kursu medisina iha Cuba hodi mai fo atendementu saude ba Timor oan tomak ect.

ZEESM iha Oecuse ne’ebe lidera husi Sekretariu Geral FRETILIN nudar dalan atu buka reseita alternativa ba ekonomia no modelu dezenvolvimentu ba Timor Leste.

Baku Militantes FRETILIN iha Laga PNTL Tenki Atua

Deputadu Bankada FRETILIN Kamarada David Dias Mandati husu Polisia Nasional Timor Leste (PNTL) tenki investiga no foti asaun ba atetude husi militante partidu  balun ne’ebe baku joven nain rua iha Samagia,Suku Tiqinomata, Postu Administrativu Laga, Municipiu Baukau iha sabadu semana kotuk.

Iha plenaria Parlamentu Nasional (26/09/2016), Kamarada Mandati foti kestaun ne’e tanba partidu balun ba halo konsilidasaun la koalia sira nia politika no programa maibe halo fali krimi.

 “Polisia sira tenki hare I tenki monitoriza nafatin,purque iha partidu balun komesa destabliza situasaun, ba insulta ema kuandu sira ba halo sira nia konsulidasaun, ema labele ona movimenta , baku ema, tuku ema, kuantu mais la fo ema para movimenta,” ejize Mandati.

Kamarada Mandati ejize atu investiga saida mak akontese iha ne’eba, nune’e bele foti asaun ruma.

“ Haruka kedas ema ba para hare tuir kedas saida mak akontese iha Laga, saida mak akontese iha Samagia. Polisia iha Laga halo tiha ona relatoriu mai Komadante Geral hau hein katak, Komadante Geral (Komisariu Julio Ornai)  bele halo ona buat ruma,” dehan Mandati.

Tuir Kamarada Mandati katak, Partidu Politiku lao ba baze, ba konsolidasaun hodi koalia programa partidu nian,  koalia frakezas ne’ebe iha para hadia hanesan frakeza sosiais, ekonomika, social, cultural siguransa no defeza laos ba insulta fali ema no halo krimi.

Komonidade Fatumea no Fatululic Balun Seidauk Asesu ba Elitrisidade

Deputadu Bankada FRETILIN Kamarada Fransisco de Andrade, preokupa makas tanba  komonidade sira iha Suku Belulik Karaik, Postu Administrativu Fatumea no Komonidade sira iha, Aldeia Fatuloro, Suku Taroman, Postu Administrativu Fatululic, Municipiu Covalima seidauk asesu ba elitrisidade.

Iha plenaria Parlamentu Nasional Kamarada Fransisco Andrade, foti kestaun ne’e hodi ejizé Ministeriú Obras Públika Transporte no Telekomonikasaun atu responde lalais.

Iha Suku Belulik Karaik, Postu Administrativu Fatumea, Kamarada Andrade dehan, Besi Rin elitrisidade tau iha fatin ne’eba desde 2012 maibé ate agora seidauk harii.

“Povu Fatume kestiona nafatin konaba eletrisidade, iha tinan 2012 , eletrisidade rin ba tau tiha ona iha Fatumea, Suku Beluli Karaik, maibé ate adata rin ne’e atu harii deit mos lae,” dehan Kamarada Andrade.

Entertantu iha Aldeia Fatuloro, Suku Taroman, Postu Administrativu Fatululic to’o agora seidauk asesu energia elitrisidade maske autoridade lokal iha area ne’eba hatama ona proposta ba governu atu bele dada elitrisidade ba sira nia hela fatin.

Iha parte seluk, Kamarada Andrade mos preokupa konaba projetu Estrada, husi mota masin mai to’o iha Haemanu Zumalai ne’ebé ohin loron paradu maske governu no kompaña asina ona kontratu.

Kamarada Andrade ejizé atu aselera projetu Estrada ne’e hodi nune’e bele fasilita movimentasaun transporte públiku iha Municipiu Covalima.

PN Deskute Ona Alterasaun Lei Pensaun Vitalisia

Parlamentu Nasional (22/09/2016) hahu halo diskusaun ba projetu lei numeru 9/III iha kuatru legilativu hodi halo alterasaun ba lei numeru 1/2007 Pensaun mensal  vitalisia ba deputadu no regalias sira  no lei numeru  7/2007 Estutu  Titular Orgaun Soberania.

Iha projetu lei aterasaun ne’e aprezenta husi Bankada Parlamentar FRETILIN no Bankada PD hodi propoin ba meja  Parlamentu Nasional no Parlamentu Nasional harii komisaun espesializada ida kompostu husi Bankada sira ne’ebe iha asentu iha PN hanesan CNRT, FRETILIN, Frenti-Mudança no PD hodi harmoniza sai texto unico subtitutivu.

Liu iha plenaria  Parlamentu Nasional aprova iha generalidade projetu alterasaun ne'e ho votu afavor 51, kontra zero no aptensaun zero ho nune'e proposta lei alterasaun ne'e sei ba deskute espesialidade.

Iha projetu lei foun ne’e propoin  pensaun ba eis Prezidenti Republika  kontinua mantein 100%, ba eis  Primeiru  Ministru tun  90%, hanesan mos Prezidenti Parlamentu Nasional no Prezidenti Tribunal Rekrusu tun ba 90%, entertantu pensaun ba Eis Deputadu no Membru governu sira tun ba 60%. Maibe iha posiblidade atu hatun bainhira tama iha diskusaun espesializada.

Molok aprezenta lei ne’e ba plenaria Parlamentu Nasional, liu husi  audensia publika Komisaun Eventual mos rona opiniaun husi sosiedade sivil no entidade hotu hodi fo sira nia opiniaun ba alterasaun lei ne’ebe sai preokupasaun publiku nian.

Vontade Bankada FRETILIN nian hahu kedas segundu legislatura aprezenta ona projetu alteraun ba lei ne’e wainhira iha tenpu ne’eba Partidu Politiku balun uza lei refere  hodi halo politika.

Esforsu Bankada FRETILIN nian iha segunda legislatura la konsege tanba projetu lei ne’e pendente iha gabeta meja Parlamentu Nasional iha momentu ne’eba.  Iha terseiru legislatura ne’e Bankada FRETILIN kontinua esforsu atu bele deskute hodi altera ka revoga lei ne’e.

PN Aprova iha Generalidade Lei Siguransa Social

Parlamentu Nasional  iha loron (21/09/2016) aprova iha generalidade proposta lei siguransa social ne’ebe aprezenta husi Ministeriu Solidaridade Sosial (MSS) lidera husi Ministra Isabel Guterres ho  Vice Ministru Miguel Manetelu.

Proposta lei siguransa social ne’e liu ho votu unanimidade (50) afavor, kontra zero no apstensaun zero. Diskusaun espesialidade sei lori ba Komisaun espesializada mak diskute molok lori ba plenaria hodi aprova iha final global.

Lei siguransa social importante tanba lei ne’e sei proteze traballadores sira ne'ebe servisu nudar funsionariu publiku no trablladores sira ne'ebe servisu  iha seitor privadu.

Iha debate generalidade Deputadu Parlamentu sira deskute no preokupa makas konaba fundus ba siguransa social ne’e mai husi ne’ebe no semak atu halo gestaun ba fundus refere hodi nune’e bele iha sustentablidade iha nia implementasaun.

Tuir Ministra Solidaridade Sosial Isabel Guterres katak,  osan fundu ne’e sei mai husi kontribuisaun traballadores no empregadores sira. Intermus administrativu instituisaun solidaridade social mak sei gere  maibe fundu (osan) sei gere  husi Banku Central.

Maibe preokupasaun sira ne’e sei debate klean iha diskusaun espesialidade hodi nune’e bele produs lei regime kontributivu siguransa social ida ne’ebe bele proteze traballadores sira ne’ebe servisu iha seitor publiku inklui mos seitor privadu.

Militantes PD iha Fatululik Nain 104 Afilia ba FRETILIN

Militantes Partidu Demokratiku (PD) hamutuk nain 104 iha Suku Taroman,  Postu -administrative Fatululik, Municipiu Covalima ofisialmente deklara sira nia an hodi afilia ba Partidu Frente Revolusionaria Timor Leste Independente (FRETILIN).

Seremonia afiliasaun halo iha Aldeia Fatuloro, Suku Taroman ne’ebe partisipa husi membru CCF Inacio Moreira, Deputadu Bankada FRETILIN , Leonel Marcal no Fransisco de Andrade,Vice Kordenador Distritu Covalima Alexandrino ho estrutura Postu-administrativu, Sekretariu Geral Joventude FRETILIN Abrao Nokosicu ho estrutura joventude postu administrative Fatululic iha loron 17/09/2016.

Vice Kordenador PD Postu Administrativu Fatululic,   Juel da Cruz dehan sira deside fila ba FRETILIN tanba durante tinan 10 husi governu AMP too mai Bloku Koligasaun la lori dezenvolvimentu ba povu iha postu administrative Fatululic.

Eis Vice Kordenador PD Juel da Cruz dehan, sira deside fila ba FRETILIN tanba dezenvolvimentu ne’ebe halo durante ne’e mosu diskriminasaun, hanesan Estrada husi Fatululic ba Covalima nia kondisaun grave, elitrisidade aldeia Fatuloro rasik seidauk tama, kondisaun eskola publiku no saude sei dook husi espetativa.

“Ami deside fila ba FRETILIN tanba hakarak haforsa partidu istoriku ne’e hodi nune’e iha forsa politika ida atu bele lori dezenvolvimentu mai povu postu administrativa Fatululic no Timor Leste en geral,” dehan  Juel da Cruz.

Juel promete katak, nia parte sei esforsu atu kontribui hodi hametin FRETILIN iha Fatululic nune’e bele manan iha eleisaun geral 2017.

Reprezentante membru CCF, Inacio Moreira hatete, FRETILIN fo benvidu ba militantes PD ne’ebe hakarak fila mai FRETILIN ne’ebe defende povu TL hahu husi tinan 1975 too mai agora.

“Benvindu ba kamarada sira ne’ebe hakarak fila mai FRETILIN,  odamatan FRETILIN nakloke ba imi,” dehan membru CCF Inacio Moreira bainhira simu karta deklarasaun husi afiliantes sira.

Inacio Moreira husu atu povu tomak atu iha 2017 vota ba FRETILIN nune’e bele halo dezenvolviementu  iha Timor Leste liliu hadia kondisaun Estrada Municipiu Suai.

“Ita labele halo diskriminasaun hanesan ne’e, governu la fo atensaun ba povu Suai, liliu nesesidade baziku (Estrada,elitrisidade, saude no edukasaun,” dehan Inacio.

Maske ohin loron nia hola parte iha sestu governu konstitusional, Inacio dehan, sira nia kompetensia limitadu, tanba pesoal FRETILIN ne’ebe hola parte governu ba ajuda deit no la foti desizau

Iha fatin hanesan deputadu Bankada FRETILIN Leonel Marcal hatete, durante tinan 10 dezenvolvimentu la lao tanba ne’e FRETILIN mak tenki fila ba ukun hodi liberta povu TL.

“Benvindu ba kamarada sira ne’ebe hakarak fila mai FRETILIN, tanba FRETILIN mak bele liberta povu laiha tan partidu seluk,” dehan Leonel Marcal.

Leonel Marcal dehan, partidu foun  barak mosu maibe nia lideransa sira ne’e mesak tuan deit, periodu ida iha partidu ida, periodu seluk iha partidu seluk tanba sira nia objetivu mak buka kadeira ba sira nia an.

Tanba ne’e, Leonel Marcal husu povu atu vota ba FRETILIN hodi kontinua luta ba libertasaun do povu hodi kumpri komprimisiu 1975 katak, liberta patria no liberta povu. Patria liberta ona agora tama segundu luta mak libertasaun do povu.

FRETILIN dedika nia Energia Tomak, Hodi Debate Lei Anti Korrupsaun, Altera LPV no Lei Rai Nian

Deklarasaun Politika Bankada FRETILIN iha sesaun legislativa ba dala ikus terseira legislatura nian,  husi Prezidenti Bankada Kamarada Dep. Aniceto Guterres.

S.E. Presidente da Republica Democratica de Timor-Leste

S.E. Presidente Parlamento Nacional

Distintos Deputados do Parlamento Nacional

Excelencias Membros do VI Governo Constitucional,

S.E.  Representante do Presidente do Tribunal de Recurso,

Distintos convidados,

Povo maubere tomak,

Excelencias,

Bom dia!  Hakoak bot ba ema hotu!

Iha sistema semipresidencialista ne’ebe Timor-Leste hili ona, Parlamento Nacional nudar órgão democrático-representativo, no órgão de soberania da Republica, mak hetan knar ka função legislativa, função fiscalização no função de decisão política.

Hosi legislatura ida ba legislatura seluk, parlamento nacional nia knar mak tolu ne’e, maibe desempenho kada legislatura mak la hanesan. Agora, Parlamento Nacional iha ona terseira legislatura, no ohin dadaun, iha sesaun solene ne’e duni ita hahu’u quinta sesaun legislativa ka sesaun legislativa ba dala ikus terseira legislatura nian.

Terseira legislatura ida ne’e, maka hau temi legislatura konsensus nian, legislatura de estabilidade politika e governativa. Nune’e, iha terseira legislatura ne’e, Parlamento Nacional desempenha ona papel importante no nia lalaok mos positivo, tanba iha legislatura ida ne’e duni maka mosu hosi Parlamento Nacional, leis estruturantes lubun ida no decisão política barak ne’ebe importante tebes atu fo solusaun ba problemas nacionais iha vida estado no desenvolmimento Nacional nian.Susesu ne’e, tanba politika konsensus ne’ebe resulta hosi postura politika hosi partidus politiku sira ne’ebe iha asentu parlamentar, liu-liu hosi FRETILIN nudar partido opozisaun ne’be hakarak servisu hamutuk hodi kontribui ba paz, estabilidade no Desenvolvimento Nacional.

Embora iha susesu no hetan apresiacao hosi ema barak, maibe, Politika Konsensu mos hetan kritikas hosi parte balu iha ita nia sociedade katak konsesus ne’e halakon opozisaun, nune’e hamate demokrasia. Sira ne’ebe kritika bele iha razaun atu hatete hanesan ne’e, tanba nudar órgão democrático-representativo Parlamento Nacional maka realiza lolos no tenke sai lalenok ba democracia representativa iha Timor-Leste. Maibe ba ita nia kontestu Timor-Leste ne’ebe estado foun no frágil, ho estituicoes estadu ne’ebe sei nurak no fraku, rai ne’ebe foin hahu halo desenvolvimento nacional nudar procesu ida ne’ebe crucial no liu hosi dalan naruk tebes no kleuk ba mai, ita Maubere oan sira laiha dalan seluk, ita tenke servisu hamutuk maske ida-idak iha nia partidu. Ita Politiku sira tenke iha konsiensia katak dalan mak ida ne’e, katak demokrasia ba rai ida hanesan Timor-Leste laos atu fahe ita, demokrasia atu fo liberdade mai ita atu hanoin diak liu, liberdade mai ita atu organiza’an diak liu, liberdade ba ita atu tau ita nia matenek atu servi diak liu. Ne’e maka demokrasia ba Timor-Leste, atu fo k’bit ba ita atu hametin paz, hametin estabilidade, atu respeita malu. Ho demokrasia hanesan ne’e maka ita bele hadia no desenvolve diak liu ita nia rain.

Nune’e, konsensu laos mak objetivu. Konsensu sai nudar dalan ida, dalan atu hametin própria democracia, no dalan atu hametin paz, estabilidade no desenvolvimento.

Sr. Presidente Parlamento Nacional,

Caros Distintos Deputados,

                                      

Hafoin liu tiha resesu durante fulan rua, ohin ita hahu fali ita nia knaar iha uma fukun ne’e. Durante fulan rua ita resesu, hodi ba hasoru no koalia ho ita nia povu no militantes sira konaba moris estadu nian no moris povu nian. Ita observa no rona ona husi ita nia povu konaba situasaun real ohin loron.

Ee pena que ita seidauk hatene lolos estado da nacao hosi Governo. Maibe, sa ida maka ita acompanha maka Dezenvolvimentu lao dadaun ona iha ita rain maske buat barak mak presiza halu, hadia no fortifika liu tan.Dezenvolvimentu iha area agrikultura presiza hasa’e makaas tan, edukasaun presiza hadiak liu tan, sapresiza hadia atendimentu publiku iha seitor saude, infrastrutura presiza dezenvolve seriu liu tan, administrasaun publiku no seluk tan; ho liafuan badak katak dezenvolvimentu lao dadaun maibe tenke iha avaliasaun diak hodi presta servisu diak liu tan ba ita nia povu. Tanba ne’e orgaun soberanu no orgaun estadu hotu presiza servisu hamutuk no makaas liu tan hodi hadia kualidade servisu ba povu, hasa’e nivel ekonomia no moris povu nia.

Parlamentu Nasional halu ona nia knaar maibe presiza hasa’e produtividade liu tan. Ita mos tenke rekonese katak ita la konsege hatan hotu ba espetativas ita nia povu tanba iha limitasoens oioin mak ita iha. Maske nune’e ita nafatin firme,atu hotu-hotu servisu makaas nafatin atu orgaun Parlamentu Nasional funsional ho diak no forte liu tan.

Ita presiza intesifika servisu Parlamentu Nasioanal atu apronta lei sira ne’ebe importante, antes legislatura ramata,hanesan alterasaun Lei Pensaun Mensal Vitalicia, lei Anti-korrupsaun, Pakote lei konaba bens Imoveis ka Lei Rai nian, no leis prioritários seluk ne’ebe iha tiha ona iha Parlamento Nacional no sira seluk ne’ebe EM breve sei hato’o hosi Governo.

La haluha mos katak Parlamento Nacional tenke halo nia kompromisu atu halo  fiskalizasaun ne’ebe forte liu tan, rigorozu no kualidade,  iha tempu restu legislatura nian.

Iha orsamentu rektifikativu 2016, Bancada FRETILIN kontribui ona hodi buka solusaun ba problema estadu hanesan dividas estadu; tanba orgaun estadu hotu iha dividas. Orsamentu ne’e presiza atu resolve problema hirak ne’e, atu nune’e iha future mai la fo todan governu sira seluk ne’ebe tuir mai. Alein ne’e; bankada FRETILIN mos ejiji nafatin ba Governu atu eksekuta osan ho didiak tanba orsamentu ne’ebe gasta ohin hanesan investimentu ba future. Tenke iha balansu entre despezas ho rezultadu. Ho nune’e mak, orsamentu bele uza ba harii alicerce ekonomia ne’ebe diak iha futuru.

Excelencia Senhor Presidente da Republica,

Sr. Presidente Parlamento Nacional,

Distintos Deputados,

Bancada FRETILIN hakarak apela ba Parlamento Nacional no Presidencia da República, atu fo nia atensaun ba Lei Anti-Corrupsaun tanba problema korrupsaun sei sai preokupasaun bot ami nian,  ita hotu nian, nasaun no povo tomak mos preokupa.Bancada FRETILIN preokupa tebes ho Projetu Lei Anti-Korrupsaun nebe subscreve hosi bancadas parlamentares hotu, ne’ebe kleur tebes ona iha Uma Fukun ida ne hahú kedas husi Segunda Legislatura to’o Terseira Legislatura atu remata,  nafatin seidauk iha sinal atu hetan aprovasaun iha tempu badak. Ne’e  bele hatudu katak ita nudar Estadu ladún iha seriedade halao politika luta hasoru korrupsaun iha ita nia rain.

Tanba ne’e, Bankada FRETILIN husu atu tau prioridade ba tinan ikus mandatu sesaun legislativa iha terseira legislatura ne’e no Lei Anti-Korrupsaun bele aprova molok mandate legislature ne’e ramata.

Lei Anti-Korrupsaun nebe Timor Leste precisa, tuir prespetiva Bancada FRETILIN nian mak lei ne’ebe  tenki forte, lei ne tenki iha klauzula ida hodi kriminaliza fraude konstrusaun, liu-liu lei ne’e enkuadra mos iha prinsipiu “inversaun onus de prova” ka “asas pembuktian terbalik” ga enrikesimentu ilisitu. Lei Anti korupsaun ida hanesan ne’e tenke kompleta ho lei konaba deklarasaun no registu rikusoin ne’ebe tenke  deklara konaba rikusoin nia origem ka mai husi ne’ebe, ba entidades hotu Estadu nian . Deklarasaun ka registo de bens ne’ebe ohin loron ita halo daddauk ne’e, so hetan nia sentido baihira lao hamutuk ho sistema inversaun ónus de prova.Katak, se laiha inversaun ónus de prova, deklarasaun ka registo rikusoin la vale buat ida, buat mamuk ka sai politika “lip service”.

Exelencias, SR Presidente da Republica,

Senhor Presidente PN,

Senhores Membros do Governo,

Hanesan nasaun post-konflitu, ita presiza hametin liu tan unidade nasional; laos deit iha diskursu politiku deit maibe mos tenke tau iha pratika ita nia atus politika loron-loron, nune’e ita nia unidade sei metin liu tan. Unidade nasional laos iha sentidu uniformidade husi orgaun soberania estadu nian sira.Bele iha diferensia maibe importante mak oinsa ita komunika diferensias ne’ebe iha liu husi dalan ka kanais apropriadu estadu nian, ho formas ne’ebe mak iha sentidu respeitu mutua entre orgaun estadu. Ita bele forma argumentu oioin hodi fumenta ita nia pensamentu no konviksaun ba politika dezenvolvimentu Timor Leste iha future. Pensamentu kritiku importante tebes hodi hametin no haburas vida ita nia estadu ne’ebe demokratiku, ho civismu.

Ita nia estadu sei nurak, tanba ne’e ejije mai ita hotu atu kuidadu no hakiak didiak. Ho kuidadu no hakiak, itabele haburas ita nia estadu no povu  ba dezenvolvimentu ne’ebe diak no sustentavel ba futuru. Ita mos presiza tebes estabilidade, laos deit estabilidade intermus seguransa maibe estabilidade politika hodi hadook ita nia povu husi duvidas,tauk, nune’e sente hakmatek hodi dezenvolve sira nia moris.

Iha fulan hirak ne’e, diskusaun, ka debates no kriitikas iha sosiedade nia let konaba pensaun vitalisia manas tebes no dala ruma opiniaun sira ne’e la focus ona ba atu fo alternativa ka solução, maibe transforma ona sai issu politiku alias politiza ona, no buka hases fokus, ba trata malu deit. Bankada FRETILIN ho konsiensia tomak no komitmentu atu halu alterasaun ba lei pensaun vitalisia ne’e. Ema balu mos hatete katak FRETILIN momentu ne’e maioria iha Parlamentu Nasional mak aprova lei ne’e,  maibe haluha katak partidos politikos asentu parlamentar hotu iha momento neba hamutuk aprova ho unanimidade lei ne’e. Iha tempu ne’eba, iha kontekstu no realidade  ida ne’ebe la hanesan ohin loron. Lei ne’e laos benefisia FRETILIN deit maibe akumula partido hotu ne’ebe mak iha asentu iha Parlamentu ne’e, no partido ka koligasaun partido sira ne’ebe kaer ona ukun iha governo  no karik ita bele kompara sira ne’ebe hetan benifisiu husi lei  ne’e barak liu laos husi FRETILIN.

FRETILIN simu kritika sira ne’e, mas wainhira FRETILIN laos ona maioria iha segunda Legislatura propoin ona alterasaun maibe la hetan aprovasaun hosi maioria ka koligasaun ne’ebe ukun, tanba sa maka fo sala nafatin ba FRETILIN?

Tanba ne’e kritika konaba pensaun vitalisia agora ne’e bombastiku tebes no ho lian Indonesia berlebihan no cari-cari kesalahan, uza isu hodi halo fali politika.

Iha parte legislação, Bankada FRETILIN sei dedika ninia tempu, energia no atensaun hodi halu lei ka altera lei ne’ebe iha. Espesifikamente alterasaun ba lei pensaun viatlisia,FRETILIN kosiente, nune’e maka halu esforsu kedas husi segunda legislatura no iha legislatura ne’e hatudu nafatin vontade ne’e atu hamutuk ho partidu seluk iha parlamentu ne’e atu halu alterasaun fundamental  ba lei refere. Maibe, desizaun ikus kabe ba plenário Parlamento Nacional, tanba plenário mak soberano, plenário mak adopta diploma  ruma atu sai Lei, enquanto FRETILIN sei minoria no kontinua iha opozisaun iha Parlamento ida ne’e.

Excelencia sr. Presidente da Republica

Sr. Presidente PN no kolegas Deputados,

Senhores membros do Governo,

Senhora Representante Prezidenti Tribunal de Recurso,

Konvidadu sira hotu,

Iha sesaun legislativa ba dala ikus iha terseira legislature ne’e duni, ita sei hasoru eventu politiku nudar agenda nasional 3(tolu) mak hanesaan eleisaun lideransa komunitariu, eleisaun Presidensial no eleisaun legislative. Eventu hirak ne’e importante tebes atu hametin ita nia estadu de direito democrático, nune’e sei asegura desenvolvimento nacional. Tanba ne’e husu ba Governo no orsgaos de soberania sira seluk atu halo preparasaun ho diak no garante estabilidade, tranquiliodade no paz, atu halo susesu dala ida tan democracia iha ita nia rain. Nune’e, ita hotu hein konkorentes sira tanto individu , hanesan mos partidos politikus sira no ema hotu atu kolabora hodi hamosu ambiente ne’ebe calma no hases violência, hodi respeita vontade popular ne’ebe sei hatudu iha urna iha kada eleisaun, no ikus mai simu resultado eleições ne’e.

Iha  democracia, se mak hakarak manan, nia tenke pronto atu lakon. Se hakarak manan deit mak demokrasia mak sei lakon, democracia mak mate. Inportante, se mak manan ita husik sira ba ukun , maibe importante liu iha democracia maka se mak lakon aseita nia lakon no kolabora ho sira ne’ebe manan no ukun.Se laos hanesan ne’emak, Timor-Leste sei ba para iha ne’ebe ita la hatene !

Maka ne’e deit ba ita boot sira nia atensaun hato’o obrigado wain

HAMUTUK ITA BELE

Dr. Aniceto Longinhos Guterres

Prezidenti Bancada FRETILIN