ZEESM Modelu ba Dezenvolvimentu, FRETILIN Manan iha 2017 Sei Implementa iha TL Tomak

Sekretariu Geral Partidu FRETILIN  Kamarada Mari Alkatiri hatete, programa Zona Espesial Economia Sosial Merkadu nudar ezemplu ba dezenvolvimentu nasional , tanba ne’e bainhira povu fó fiar ba FRETILIN hodi manan iha eleisaun geral 2017, programa hanesan sei implementa iha distritu hotu iha Timor Leste.

“ Ita manan iha (eleisaun) 2017, ezemplu Oecusse nian sei mai iha distritu hothotu,” dehan Dr. Mari Alkatiri  bainhira halo kampaña regionál iha Distritu Baucau ne’ebé kompostu husi distritu Lautem, Viqueque, Manatuto no Baucau.

Dr. Mari Alkatiri dehan, programa ZEESM iha Oecusse nudar sentru pilotu numeru III hafoin sentru pilotu numeru I iha Aiseremou (Aileu) no Sentru Pilotu Numeru II iha Bucoli (Baucau) ne’ebé halo iha tinan 1975.

“Prezidenti (Lu-Olo) ho hau rasik antes mai iha ne’e, ami liu husi Bucoli, Buibere (OPMT) sira iha Bucoli fó hanoin mai ami, sentru pilotu numeru I (ida) iha Aiserimu (Distritu Aileu), Sentru Pilotu numeru II iha Bucoli (Distritu Baucau), hau  fó hanoin ba biberes sira ne’e, Sentru Pilotu numeru III iha Oecusse,” dehan Mari Alkatiri.

Tuir Kamarada Mari Alkatiri katak, ida ne’emak  FRETILIN hatudu dadauk , bainhira FRETILIN kaer ukun FRETILIN halo no lori rejultadu ida diak maske ho tenpu badak.

“Sira (kamarada sira iha Bucoli ) dehan fali Bucoli sei ba to’o Oecusse, hau dehan lae Oecusse mak sei mai to’o Bucoli, Oecusse mak sei ba to’o Lospalos, Oecusse mak sei ba to’o distritu hothotu,” dehan Kamarada Mari Alkatiri.

FRETILIN Husu Investiga Ema Ne’ebé Riska Bandeira RDTL

Deputadu Bankada FRETILIN iha Parlamentu Nasional lamenta hahalok joventude balun ne’ebé hakarek at bandeira nasional tanba ne’e husu Polisia Nasional Timor Leste investiga.

Iha plenaria komisaun permananente Parlamentu Nasional loron 03 Agostu 2016 Kamarada Deputadu Manuel Castro lamenta tanba bandeira RDTL nudar sinbolu nasional RDTL ne’ebé sosa ho ruin no ran.

“Bandeira ema sosa ho ruin no ran, ema rihun atus ba atus mak mate hodi sosa bandeira ida ne’e, I ohin ema grupu ida sira haksolok liu sira halo bandeira ne’e hanesan tiha  hena at ida,” Lamenta Castro

Perzija halo investigasaun  ba sidadaun sira ne'ebe hakerek a’at bandeira RDTL tanba falta respeitu ba sinbolu nasional.

“Husu investigasaun ba ema sira hanesan ne’e tanba ema sira hanesan ne’e falta de respeitu ba ita nia sinbolu nasional, edukasaun laiha,” dehan Castro.

Iha fatin hanesan Kamarada Ossorio Florindo PN tenki halo karta ida ba federasaun motorcros ne’ebé halo traisaun ba bandeira RDTL.

 “Parlamentu Nasional  tenki halo karta ida ba federasaun motorcros nebe mak halo traisaun ba ita nia bandeira,” dehan Ossorio.

Ossorio mos kontra ema atu faan bandeira nasional iha fatin publiku tanba bandeira ne’e bandeira sagradu ne’ebé sosa ho ruin no ran.

“Loron boot mai ne’e hau hanoin ema labele faan bandeira nasional iha dalan-dalan, husu labele faan ona, se bele ita hodi osan estadu sosa fahe ba povu tomak , uma kain idaidak loron boot ne sira hasae, laos ita sosa fali bandeira nia folin ne’e hanesan $0,50 no $1.00 , serake mate sira ne’ebé too ohin loron ita buka ruin too la hetan ne, sira nia folin ne’e $1.00 no $0.50 nia folin, ga halo nusa?,” lamenta Ossorio.

Labele admite atu ema buka moris ho buat neebe mak heroi sira defende ho sira nia ruin no sira nia ran, ohin loron oan kiak no feto faluk barak iha rai ida ne’e, tanba defende sinbolu nasaun ida ne’e nian.