Bancada Fretilin iha uma fukun Parlamentu Nasional
sei esforsu nafatin atu avansa projecto
de lei anti korupsaun atu hetan lalais aprovasaun hosi PN antes mandatu nee
remata, Projecto de lei nee iha instrumentu
balun nebee eficas duni mak hanesan,”Onus
de Provas” (pembuktian terbalik), ida nee importante tebes tuir realidade
Timor Leste nian, e bele mos fo vantagen boot ba autoridade justica sira atu
fasilita diak liu tan sira nia servisu
investigasaun, atu bele hetan
provas ba alegasoens sira nebee hetan iha prosesu nian laran ba krime
kuropsaun. Atu hatene diak liu tan kona
ba asunto nee, Tuir mai intervista
esklusivu ho Vice Chefe Bancada Fretilin Deputado Fransisco Miranda Branco.
Oin sa Politika Fretilin nian atu Kombate
Korupsaun iha Timor Leste?
Cmrd. Branco: Hau Hakarak konta
oituan istoria ba kotuk bainhira Fretilin kaer ukun nia
preukupasaun primeiru maka harii
Provedoria Direitus Humanos de Justica (PDHJ),
ninian objektivu para estadu bele
harii praktica boa governasaun diak, boa gestaun finansas publika nebee
diak iha ita nia estadu laran, tamba iha tempu nebaa papel PDHJ nian maka
respeitu direitus humanos no pratika boa governasaun,e bele halo mos prevensaun
ba pratika de korupsaun,ida nee mak politika Fretilin nian atu kombate
korupsaun.
Iha tinan 2009 Aliansi Mayoria Parlamentar (AMP)
forma instituisaun ida apropriadu ba luta kontra korupsaun entaun PDHJ haree
liu deit ba kestaun direitus humanos,
boa governasaun, no boa administrasaun e kestaun korupsaun intrega ba area
responsabilidade Komisaun Anti Korupsaun (KAK). Kuando AMP harii fofoun Komisaun Anti Korupsaun, Pozisaun
Fretilin nian kestiona katak la presiza tamba pais kiik hanesan Timor Leste ho
populasaun 1 milaun deit ladun iha efisiensia para atu harii instituisaun
bar-barak, maibe depois de tinan hitu liu tiha ita haree katak iha nesesidade
tamba ho progresu nebee ita nia estadu iha ita mos bele konkorda katak tengki
iha duni instituisaun nebee especial hodi toma konta ba area korupsaun nian
importante tebes. Tamba korupsaun mos
bele ligadu ho krime organizadu, bele mos mai hosi pratica kontra lei. Agora dadauk ita mos iha ona Polisia de
investigasaun kriminal hodi kompleta instituisaun sira nee hodi kombate
korupsaun, tamba kestaun de korupsaun
nee laos fasil atu bele hetan alegasaun ka provas.
Mosu
Kritika hosi Sosiade Civil sira katak PN maka budu hela lei anti korupsaun iha
gaveta laran,e laiha insiativa atu debate?
Cmrd. Branco: Projecto de lei anti korupsaun nee produtu Fretilin
nian nebee hetan mos apoiu hosi bancada sira seluk, e desde tinan ida liu ba
aprezenta ona ba iha meja Parlamentu iha momentu nebaa sei dirije hosi
Presidente Parlamentu Nasional Vicente Guterres maibe nungka iha avansu, e foin
lalais iha mudansa ba Presidente PN foun Aderito Hugo maka foin hatudu vontade
hodi hatun ona ba komisaun eventual ida nebee forma hosi bancada parlamentar
sira hodi analiza no estuda hodi loke audensia e halo pareser ida nunee bele
aprezenta iha Plenaria hodi nunee bele hetan aprovasaun.
Bele
esplika kontiudo fundamental projecto de lei anti korupsaun?
Cmrd. Branco: Projecto de
lei nee iha instrumentu balun nebee
eficas duni mak hanesan,”Onus de Provas”
(pembuktian terbalik), ami hanoin katak klauza ida nee importante tebes tuir realidade Timor Leste
nian, tamba ita foin ukun an ita nia
rekursu humanos mos sei limitadu tebes, tamba nee fasilita ita nia rekursu humanos intrudos ba
lei nia laran, instrumentu ida nebee bele ajuda sira atu bele prova
alegasoens nebee hetan durante prosesu nia laran. Hau
hanoin se klauza ida nee mak liu entaun ita tengki reforsa tan ita nian instrumentu legal ida nee. Krime
korupsaun nee la fasil atu hetan nia provas dala barak autores krime bele uza
meius oin-oin hodi halakon provas, tamba nee ami hanoin katak tengki hatama duni
onus de provas nee ba instrumentu legal para atu fasilita diak liu tan
investigasaun, fasilita diak liu tan ita nia autor justice sira atu bele hetan provas ba alegasoens sira
nebee hetan iha prosesu nian laran ba krime kuropsaun.
Ida seluk tan maka kriminalizasaun de konstrusaun civil/Fraude na Construcao katak,
projecto ida harii tiha ona maibe la tuir obra ka BOQ nebee iha, agora dadauk ho vakum lei nebee iha seidauk
akontese mais se karik lei nee aprovadu duni maka lei nee bele kriminaliza asaun sira hanesan
nee, e bele konsidera hanesan krime
korupsaun, se ida nee mak realiza duni hau fiar katak ita bele kombate
korupsaun iha ita nia rai. Kestaun fundamental lei anti kuropsaun nian nee maka
Onus de Provas/pembuktian terbalik, se karik estadu Timor Leste bele ultrapasa
situasaun ida nee maka hau hanoin bele fo vantagen boot ba
estado liu-liu autoridade justica sira hanesan ministerio publiku, KAK,
no tribunal tamba bele sente kman liu atu halo prosesu investigasaun ba
alegasoens nebee iha, tamba bele
fasilita sira, e nia rasik mak mai prova kontra katak akuzasaun nee la los ita
la presiza buka provas, nia rasik mai
halo declarasaun hodi kontra akuzasaun nebee iha.
Bainhira
los mak Lei nee atu deskute?
Cmrd. Branco: Projecto de Lei anti korupsaun nee entrega ona ba
komisaun A hodi halo analiza, maibe
bancada Fretilin sei fo hanoin nafatin atu lei nee bele avansa nafatin ba oin,
e bele remata no hetan aprovasaun hosi Parlamentu Nasional e hetan mos
promulgasaun hosi Presidente da Republika antes mandatu nee remata, ida nee hanesan parte ida mos hosi
komprimisiu Fretilin nian ba povu desde uluk kedas katak tengki iha boa
governasaun diak, boa administracao diak e tengki kombante duni korupsaun iha
ita nia rai laran.
Projecto
de Lei anti korupsaun nee produtu Fretilin nian, iha esperanca hetan aprovasaun hosi PN ka lae?
Cmrd. Branco: Hau sente ho postura foun politika Fretilin nian
nee, ho entendementu forca politika
nebee iha ho ambiente nebee propisiu,
hodi dehan katak hamutuk ita bele, tengki tradus duni iha realidade
katak ita tengki hamutuk hodi kombate
korupsaun iha ita nia rai laran, nunee
ita labele fo konsekuensia boot ba ita nia estadu tamba estadu investe
osan barak nu fim osan nee la benefisia povu maibe benefisia deit ba ema ba
grupo balun deit nee bele hamosu injustica social, tamba nee maka bancada
Fretilin sei halo akompanhamentu ba situasaun nee to hetan aprovasaun hosi PN
no promulgasaun hosi Presidente da Republika.
Oin
sa Deputado nia haree ba servisu KAK
durante nee?
Cmrd. Branco: Tuir hau nia haree Politika KAK nian diak maibe la
seriu tamba KAK harii tiha ona iha tinan
7 nia laran maibe foin maka Sexto governu konstituisional halo nia lei
organika. oin sa mak ita harii
instituisaun ida ita la fo instrumentu ida ba nian, laiha lei ida propriadu ba
nia kaer atu luta kontra korupsaun,o e
la fo estatuto organica ida, liu tiha
tinan 7 mak foin fo, nee hatudu momos katak
ita ladun seriu. Hakarak ka lakoi hau interpreta katak laiha seriedade
politika, ita hakarak harii maibe la seriu atu halao, e ida nee hau bele dehan
katak KAK hanesan amostra deit. Maibe ho evolusaun progresu ba oin nee ita
tengki seriu duni hodi luta kontra korupsaun, tamba se lae korupsaun sei buras
iha ita nia rai.
Oin
sa Bancada Fretilin nian mensagen ba entidades hotu inklui povu tomak iha Timor
Leste atu hamutuk kontra korupsaun?
Cmrd. Branco: Ita hotu tengki
konsidera korupsaun nee hanesan virus ida nebee bele destroe estadu, destroe
jerasaun, no bele destroe nasaun. Ita
bele iha instrumentu legal, ita bele iha
instituisaun sira nebee ita harii, maibe importante maka tengki iha
seriadade politika e tengki hatudu duni iha pratica hodi halo prevensaun hodi
kontra korupsaun. Sosiadade mos tengki kontribui, labele hein deit hosi instituisaun
sira nebee estadu harii, tengki iha kontrola social. Liu hosi GOPAC ami harii
ona rede ida hanesan instrumentu ida hamutuk
hodi kombante korupsaun, ami estabelese paseria ho universidade tomak
iha TL, ho sosiadade civil sira, atu hili problema korupsaun nee henesan virus
ida nebee hotu-hotu tengki fo liman ba malu hodi kontra korupsaun.
Tidak ada komentar:
Posting Komentar