ASDT 320 iha Suku Manapa Fila ba FRETILIN

Estrutura no militantes partidu ASDT iha Suku Manapa, Postu Administrativu Kailaku, Municipiu Maliana hamutuk ema nain 320 deklara fila fali ba knua FRETILIN tanba ohin loron partidu 30 resin maibe so FFRETILIN mak iha prinsipiu , planu no programa ida diak atu liberta povu.

Iha loron (2/7/2016) Estrutura ASDT kompustu husi Kordenador ASDT Calisto Alberto, Sabino Mendes (Vice I), Caitano Soares (Vice II) hamutuk ho militantes kuaze 320  fila afilia ba FRETILIN  tanba hafoin saudozu Fransisco Xaviar do Amaral nia mate, ASDT fahe  malu tanba  diferensia ideia no interese pesoal nian as liu duke interese povu nian.

“Ami militantes ASDT iha Suku Manapa sei fo votus ba FRETILIN tanba ita hotu hatene ASDT mak halo transformasaun ba FRETILIN. Ami ne’ebe mak avialia hamutuk 320 ho lista anexu,” dehan Alberto.

Sira fiar katak, FRETILIN deit mak iha abilidade atu liberta povu husi kiak no mukit.

Membru CCF/CPN, atual Xefe Bankada FRETILIN Deputadu Aniceto Guterres hatete ASDT mak transforma tiha ona ba FRTILIN tanba ne'e militantes ne'ebe mak fila, fila ba sira nia uma rasik.

“Hau labele dehan benvindo tanba imi mai fali FRETILIN  maibe uma (FRETILIN) ne’e ita hotu nian, imi nian rasik,” dehan Aniceto.

Ho realidade ukun no dinamika politika ne’ebe lao, Aniceto dehan,  povu iha konsensia ona katak so FRETILIN mak bele liberta sira husi kiak no mukit.

Patria liberta ona maibe FRETILIN nafatin kaer prinsipiu no valores libertasaun ne’ebe uluk defende hodi kontinua luta ba libertasaun do povu.

Reprezentante CCF Flavio Silva kongratula desizaun ne’ebe mak  militantes sira husi ASDT foti atu fila ba FRETILIN , partidu ida ne’ebe mak sira uluk defende nia prinsipiu katak mate ka moris ukun rasik , atu liberta patria no liberta povu.

Hamutuk fali ho FRETILIN atu luta kontra diskriminasaun no injustisa sosial iha rai laran.

“FRETILIN tenki prontu atu hamrik hodi salva nasaun ne’e. Belok ( partidu seluk ukun) tinan oualu (8) belok (ukun) lalos ona ne’emak bolu fali ema FRETILIN ba ukun ne’e, tanba FRETILIN mak nain ba ukun ne’e,” dehan Flavio.

Ema la hatene ukun sira ukun sei lalos, tanba FRETILIN mak hatene povu nia hakarak no povu nia persiza desde 1974 too agora.

“Atu sai husi problema ne’e so ita hamutuk para hasai povu husi halerik sira ne’e,” dehan Flavio.

Marka prezensa iha seremonia afiliasaun ne’e kopostu husi reprezentante CCF Flavio da Silva, Xefe Bankada FRETILIN Aniceto Guterres, Estrutura Munisipiu Maliana no organizasaun afiliadas ba FRETILIN.