Bispo Norberto: FRETILIN Mak Naroman ba TL

Amo  Bispo Diocese Maliana   Norberto do Amaral  tau nafatin esperansa ba Partidu Frente Revolusionaria Timor Leste Independente (FRETILIN) atu matein nafatin prinsipiu liberta povu husi kiak no mukit.

“Mantein nafatin prinsipiu ida liberta patria no liberta povu ne’e, ida ne’emak tenki kaer nafatin, ida ne’emak ita tenki iha esperansa ba oin nafatin,” dehan Bispo Maliana Amo Norberto Amaral.

Bispo Diocese Maliana koalia ida ne’e bainhira inkontru  Deputadu Bankada FRETILIN ne’ebé lidera husi Vice Prezidenti Bankada Kamarada Deputada Josefa Pereira, Kamarada Deputadu Aurelio Freitas, Kamarada Deputadu Paul Moniz Maia, Kamarada Deputada Angelica da Costa no Kamarada Asesor Bankada Fransisco de Vasconlho iha Maliana (06072016).

FRETILIN , tuir Amo Norberto katak  iha istoria ida naruk, FRETILIN mak naroman ba povu Timor Leste.

 “FRETILIN mak lori buat ida ne’e (ukun an)  sai ba realidade, ne’e duni sai obor (naroman) ne’ebé lakan iha nakukun laran,” dehan Amo Bispo.

Tanba ne’e, Amo Norberto iha esperansa nafatin ba FRETILIN atu realize mehi libertasaun do povu tanba FRETILIN mak naroman no referensia ba partidu hothotu iha TL atu labele ses husi dalan ne’ebé FRETILIN defende.

“Hau nia esperansa mak ne’e , FRETILIN sai nafatin naroman , sai nafatin referensia ba partidu sira seluk,”  dehan Bispo Maliana.

Dala ruma, Amo Bispo dehan, nia parte kritika FRETILIN tanba hadomi FRETILIN e hakarak FRETILIN lori mehi ne’e  sai realidade.

Iha inkontru ne’ebé inisia husi Bankada FRETILIN ne’e troka hanoin ba malu liga ho situasaun rai laran hanesan, dezenvolvimentu ne’ebé gasta ona billaun $8 seidauk lori transformasaun ba povu.

Iha inkontru ne’e koalia mos konaba planu governu atu aprezenta Orsamentu Retifikativu 2016, koalia konaba degradasaun moral iha rai laran,seitas falsu, formasaun ba joventude.