FRETILIN Manan sei Halo Uma ba Povu

FRETILIN sei halo uma  ba povu Timor Leste  liu husi politíka habitasaun komonitaria, bainhira povu fó fiar iha eleisaun Parlamentar ne’ebé mak sei realiza iha loron 22 Julhu 2017.

Uma ba komonidade ne’ebé  FRETILIN  sei halo ho kualidade no fó duni diginidade ba povu Timor Leste, laos uma modelu MDG ne’ebé governu AMP halo ho material pre-frabrikadu no laiha kualidade.

“FRETILIN sei hahu ho politíka habitasaun komonitaria, laos uma modelu MDG, MDG ita sei hasai,” dehan Secretariu Jeral FRETILIN Dr. Mari Alkatiri (22/06/2017).

Politíka habitasaun komonitaria agora dadaun hahu implementa iha Regiaun Administrativu Epesial Ambeno Oecuse (RAEO) halo uma ba komonidade sira.

Tuir Sekretariu Jeral FRETILIN Dr. Mari Alkatiri, ema hotu bele asesu ba  politíka habitasaun komonitaria maibé sei fó prioridade ba povu ne’ebé merese duni.

 “Hothotu bele asesu ba uma ida diak, klaru hahu ho sira ne’ebé persiza liu ne’e, maibé politíka ba ema hothotu,” dehan Dr. Mari.

Durante governu AMP to’o Bloku Koligasaun politíka los maibé implementasaun mak sala, liliu infrastrutura baziku.

“Too agora politíka los ba aseblidade konektivida politíka loos maibé implementasaun sala tanba infrastrutura agora lao dadauk ne’e laiha kualidade (tanba) loke kuak taka kuak ne’emak sala,” dehan Dr. Mari Alkatiri. (Wono Qi)