FRETILIN Manan, Sei Harii Fundu Pensoens no Loke Inskrisaun Foun ba Veteranus

Sekretariu Geral Partidu FRETILIN Dr. Mari Alkatiri hatete, bainhira FRETILIN fila ba ukun, FRETILIN sei kria fundu de pensoéns ida ba veteranu, idozus invalidus no bolsa da maé, nune’e bele garante sustentablidade  pensaun ba veteranu, ferik katuas no bolsa da maé.

Iha kampanha abertura FRETILIN nian iha Municipiu Likisa (20062017) , Dr. Mari Alkatiri hatete, politika FRETILIN nian atu kria fundu ida ho naran fundu  de pensoens.  Osan atu kapitaliza ka investe ba  fundu ida ne’e mai duni husi fundu minarai, depois mobliza komonidade internasional atu finansia fundu ida ne’e.

Ho politika ida ne’e, tuir Dr. Mari Alkatiri katak bele garante ona sustentablidade pensaun ba veteranu sira, ferik katuas sira no bolsa da maé.

 “Hau la promote, maibe kuandu hau koalia tanba hau halo kontas ona, fundu ne’e sei garante sustentablidade politika subsidiu ba veteranus, ferik katuas no bolsa da maé,” dehan Dr. Mari Alkatiri. 

Dr. Mari Alkatiri dehan, tenki kria fundu de pensoens tanba se  governu kontinua selu pensaun veteranu sira  ho osan fundu minarai , aban bainrua minarai maran osan mos laiha atu selu veteranu sira , tanba ne’emak fundu de pensoens importante tebes.

Bainhira FRETILIN manan iha eleisaun hodi lidera fali governu  Dr. Mari Alkatiri dehan, FRETILIN sei loke fila fali inskrisaun ba veteranu sira ne’ebé mak seidauk rejistu.

 “Hau bele dehan FRETILIN manan, FRETILIN sai governu sei loke fila fali inskrisaun ba veteranu sira,” dehan Dr. Mari.

Veteranu balun simu ona tinan rua tinan tolu, balun seidauk simu, Mari Alkatiri dehan, Governu sei fó kompensasaun ba sira ne’ebé mak la simu.

“Veteranu sira ne’ebé mak seidauk simu ne’e tenki iha kompensasaun, balun simu ona tinan rua tinan tolu, balun seidauk simu agora hadia atu simu tenki hatene atu halo kompensasaun ba sira,” dehan Dr. Mari Alkatiri.

Iha veteranu balun ne’ebé mak depois independensia mak seidauk hetan sira nia direitu ba pensoens maibe sira fila ona ba manan maromak nia kadunan Santo,  nia familia sira iha direitu simu pensaun, ne’emak politika FRETILIN nian ba Veteranus.