FRETILIN Sei Moderniza Seitor Saudé Hodi Garante Saudé ba Ema Hotu

Sekretariu Geral Partidu FRETILIN Dr. Mari Alkatiri hatete, FRETILIN tenki manan iha eleisaun atu hadia saida mak halo sala tiha ona, hameitin saida mak diak tiha ona no haburas para rai ne’e atu lao ba oin.

Dr. Mari dehan, saida mak FRETILIN manan iha eleisaun atu hadia mak hanesan, sistema de governasaun, sistema ba edukasaun, sistema ba saudé tenki hadia, sistema ba agrikultura tenki hadia.

“Sistema edukasaun lao naksala, sistema saudé lao naksala, agrikultura lao naksala, (atu hadia) tenki ho politíka FRETILIN mak bele hadia,” dehan Dr. Mari iha abertura kampanha FRETILIN iha Likisa (20062017).

Ohin loron iha kuadru politíku FRETILIN nain haat (4) hola parte iha governu sira esforsu atu hadia maibé susar tebés tanba sira tuur iha kadeira maibé xave ne’e ema seluk mak kaer.

“Bainhira ita ukun ho ema seluk nia politíka susar tebés, ema nia politíka ita mak ukun susar tebes, tanba ne’e ita tenki manan hodi ukun ho politíka FRETILIN nian hodi hadia fila fali,” dehan Dr. Mari.

FRETILIN sei hadia sistema no moderniza seitor saudé, tanba agora TL iha profesionais saudé (dotores) barak tebes mai husi primeiro Governu FRETILIN rasik  lidera.

Profesionais saudé ne’ebé mak remata ona sira nia estudu , FRETILIN sei halo politíka oinsa hasae sira nia matenek iha area espesialista nian nune’e bele atende povu sira diak liutan.

“Doutor sira balu remata ona kursu maibé la iha servisu, vaga la iha, doutor sira balun servisu tinan lima (5) atu ba hasai sira nia espesialidade dehan osan la iha, ne sala ita nia sistema saudé atu lao ba oin tenki, iha ema espesialista (ba moras oioin nune’e TL labele depende ba espesialista husi rai liur no haruka bebeik moras ba rai liur),” dehan Sekjer FRETILIN.

FRETILIN sei garante saudé ba ema hotu hanesan, tanba ne’e sei hadia uluk sistema haruka doutor sira ne’ebé servicu tinan lima  (5) ba leten tenke haruka sira ba hasai sira nia espesialidade atu sira fila mai hodi hametin tan nia sistema de saudé.

“Iha fatin balu doutores barak liu imfermeiro no parteira, planu saida mak buat sira hanesan ne’e bele akontese, tamba planu no programa ba formasaun la los, bo’ot sira ulun fatuk moras deit ba Singapura,ne mos korupsaun aktiva,” dehan Dr. Mari

Iha seitor sude, FRETILIN nia politíka moderniza maibé importante liu investe ba ema  atu hasae  matenek , kuñesementu hodi bele halao servisu professional liutan.

Iha Timor Leste adopta saude  gratuita  maibé  ema moras sira ba Hospital depois fó fali reseita ba sosa aimoruk iha liur (klinika privadu) ne’e saude la gratis ona.

 Tanba ne’e , FRETILIN kompromete atu hadia saude públika ho kualidade selae ,semak iha osan ba klinika privada sira,  haruka fali moras  ba singapura , semak laiha osan ba tuur hein iha banku  emergensia dala barak la hetan asistensia.

 FRETILIN sei garante asesu ba saude ne’e labele iha deferensia entre ema bo’ot ho ema kiak hotuhotu tenki iha direitu atu asesu ba saude.  (Florindo Uka-Bere).