Sosa Saham TT Governu Lakon ho Emprezariu Lokal,  Rikusoin Estadu Labele Ema Ida Mesak Mak Akomula

Deputadu Bankada FRETILIN liu husi plenaria Parlamentu Nasional (04/07/2015) preokupa makas desizaun governu hodi lakohi sosa saham Timor Telecom tanba  governu lakon iha avaliasaun finansas ho emprezariu lokal.

Deputadu Ossorio Florindo foti kestaun  ne’e tanba nia lakohi Timor oan ida mesak mak atu akomula fali rikusoin iha TL.

 “Hau la orgullu bainhira ita akomula rikeza estadu ba grupu ida, ne’e ba sedeit, ba grupu se deit, ne’e hau la orgullu ida,” dehan Osorio ho lian makas.

Osorio dehan, iha nasaun ne’ebé mak iha avaliasaun finansas estadu bele lakon fali ho emprezariu lokal ida.

“Se situasaun ne’e akontese hanesan ne’e duni entaun nasaun ne’e ema ida nian duni ona, (heroi) sira ne’ebé mate ne’e saugate duni ona, tebes duni nasaun ne’e (sai) ema ida nian ona,” dehan Osorio

Tanba ne’e, Ossorio ejizé atu Primeiru Ministru, Ministru Finansas, Ministru Obras Públika tenki esplika iha Parlamentu Nasional tanba  diskusaun iha Konsellu Ministru mos ideia la hanesan.

Governu nia razaun, Ossorio dehan, avaliasaun tekniku governu  bele sosa saham TT nian maibé avaliasaun finansas dehan labele ida ne’e sai pergunta boot, tanba saida mak estadu lakon emprezariu lokal.

“Hau nia perguntas? Avaliasaun finansas nasaun ne’e  (nian) lakon ho avaliasaun finansas emprezariu ida nian, serake ida ne’e bele akontese?,” Ossorio kestiona.

Se governu hakarak fó deit ba individu ida ne’e deklara deit iha publika dehan fó deit ba individu refere, se lae entaun tenki loke oportunidade ba emprezariu  Timor oan hotu atu investe.

“Nasaun lakon ho ema individu!  ita hotu la hatene prosesu ne’e lao nusa? serake TT nia divida kuaze $9 milloens ida ne’e ita atu lulun ba ema ida,” dehan Ossorio.

Osorio kritika  jestaun governu nian  ne’ebé ladiak to’o ohin loron Estadu kontinua iha tusan. 

“Ita kria tiha ona orgaun outonomo ba komonikasaun nia funsaun iha ne’ebé? kontrola sasan iha ne’ebé? Derepente Timor oan ida manan (sosa asoens TT) hau orgullu Timor oan bele manan maibe hau la orgullu Timor oan (ida mesak) mak atu akomula rikeza estadu nian,” lamenta Osorio.

Koalia konaba  TT laos konaba telekomonikasaun deit maibe buat barak liga ho segredu nasaun nian ne’ebé tenki kontrola.

Iha fatin hanesan Deputadu FRETILIN Manuel Castro mos lamenta tanba ne;e nia ejizé governu tenki esplika iha PN.

“Hau husi Primeiru Ministru, Ministru Obras Públika Transporte Telekomonikasaun no vice Ministru ne’ebé tutela tenki mai esplika razaun saida mak labele sosa,” dehan Castro