Televizaun Para iha Administrador Nia Uma, Povu Leqidoe La Asiste Copa Europa

Povu iha Postu Administrativu Leqidoe, Municipiu Aileu la akonpaña informasaun rai laran, liliu jogo Copa Europa tanba Telivizaun ne’ebé Governu liu husi Ministeriu Statal ofrese, deskonfia Administrador Postu Administrativu Leqidoe rai fali iha nia uma.

Deputada Bankada FRETILIN, Josefa Pereira foti kestaun ne’e iha plenaria PN loron (04/07/2016) bainhira simu keixa husi komonidade sira husi Leqidoe.

Deputada FRETILIN ne’e konsidera hahalok administrador postu administrative Leqidoe ne’e abuzu poder .

“Simu tiha telivizaun mais Teleivizaun ne’e la lori ba Leqidoe mais Telivizaun ne’e husik hela iha nia uma, iha Aileu Villa, hau hanoin buat sira hanesan ne’e labele akontese tanba durante ne’e nia mak asiste hela bola ne’e, I laiha konsensia katak  povu iha ne’eba (Leqidoe) persiza hela,” dehan Josefa iha plenaria.

Deputada Josefa mos preokupa  servisu administrador ne’ebé la ativu tanba administrador Postu Administrativu Leqidoe nia rezidensia iha Aileu Villa , depois tama servisu la tuir lei funsaun publika nian.

“ Durante ne’e administrador ne’e ba servisu iha Liqidoe apenas loron ida no loron rua maibé iha ita nia lei hatete katak funsionariu publika ida tenki servisu loron ida oras ualu (8) nia laran,” dehan Josefa.

Josefa husu Komisaun Funsaun Públika tau atensaun ba asuntu ida ne’e no husu administrador postu administrativu Leqidoe tenki lori Televizaun ne’e ba tau iha Leqidoe.